काठमाडौं ७ मा विनोद कुमार गुरुङको उम्मेदवारी

दुर्गा ओझा न्यौपाने, माघ १०, काठमाडौं । आगामी फागुन २१ गते हुने निर्वाचनको लागि काठमाडौं जिल्ला संघीय निर्वाचन क्षेत्र नम्बर ७ बाट प्रतिनिधि सभा सदस्यमा बिनोद कुमार गुरुङ उम्मेदवार बन्नु भएको छ । काठमाडौं जिल्ला क्षेत्र नम्बर ७ बाट प्रतिनिधि सभा सदस्यका प्रत्यक्ष उम्मेदवारका रूपमा श्री बिनोद कुमार गुरुङ मैदानमा उत्रिनु भएको हो । उहाँ मानव महाशक्ति अभियान, नेपाल तथा राष्ट्रिय एकता दलको साझा प्रतिनिधित्व गर्दै उम्मेदवार बन्नु भएको र उहाँको चुनाव चिन्ह गोलाकार भित्रको तुलसीको मोठ रहेको छ ।

काठमाडौं क्षेत्र नम्बर ७ अन्तर्गत काठमाडौं महानगरपालिकाका वडा नं. १६, १७, १८ र २५, नागार्जुन नगरपालिकाका वडा नं. १, २ र ३ तथा तारकेश्वर नगरपालिकाका वडा नं. ३, ४ र ५ गरी जम्मा १० वटा वडाहरू पर्दछन् । उहाँले मतदाताहरूलाई अत्यधिक मतदान गरी आफूलाई विजयी गराउन आग्रह गर्नु भएको छ।

मानव महाशक्ति सिद्धान्त, राष्ट्रियता, एकता र सहकार्यको भावनासहित चुनावी अभियानमा सक्रिय रहेको जनाउँदै उम्मेदवार गुरुङले मानव–केन्द्रित र प्रकृति–केन्द्रित दर्शनका आधारमा स्वदेशमै जन्मिएको विचार र सिद्धान्तमार्फत देश निर्माण गर्ने प्रतिबद्धता व्यक्त गर्नु भएको छ।

उहाँले नेपाललाई हिमाल, पहाड र तराईको भौगोलिक एकताका आधारमा समृद्ध राष्ट्र बनाउने लक्ष्यसहित लोकतान्त्रिक अभ्यासलाई आत्मसात गर्दै ‘मानवतन्त्र’ तर्फ अघि बढ्ने अवधारणा प्रस्तुत गर्नु भएको छ। प्रजातन्त्र, राजतन्त्र, गणतन्त्र र लोकतन्त्रभन्दा माथि उठेर मानव केन्द्रित शासन प्रणाली आवश्यक रहेको उहाँको भनाइ छ।

उम्मेदवार गुरुङले पुरानो–नयाँ सबै राजनीतिक शक्तिहरूलाई राजनीतिक शुद्धीकरणमार्फत सकारात्मक र पवित्र कार्यदिशामा लैजानुपर्ने आवश्यकता औंल्याउँदै, देश बनाउने साझा एजेन्डामा सबै नेपाली एकजुट हुनुपर्नेमा जोड दिनु भयो । काठमाडौं क्षेत्र नम्बर ७ का मतदाताहरूलाई सोचविचार गरेर मतदान गर्न आग्रह गर्दै उहाँले “यदि विश्वास लाग्दैन भने पनि असल र इमानदार व्यक्तिलाई रोज्नुस्” भन्ने सन्देश दिनु भएको छ। प्रतिनिधि सभा सदस्यका उम्मेदवार बिनोद कुमार गुरुङले सबै मतदाताहरूलाई अमूल्य मत प्रदान गर्न हार्दिक अनुरोध गर्नु भएको छ।