१९ माघ, सुकुटे, सिन्धुपाल्चोक । होटल तथा पर्यटन व्यवसायी संघ नेपाल, बागमती प्रदेशको छैटौं वार्षिक साधारण सभा भएको छ । सहआयोजक सिन्धु सुकुटे पर्यटन व्यवसायी संघको आयोजनामा सुकुटे बीच रिसोर्ट, सुकुटे–सिन्धुपाल्चोकमा  बागमती प्रदेशको साधारण सभा सप्पन्न भएको हो । 

कार्यक्रमका प्रमुख अतिथि होटल व्यवसायी महासंघ नेपालका केन्द्रीय अध्यक्ष दिनेशकुमार चुके रहनुभएको थियो भने कार्यक्रमको अध्यक्षता होटल तथा पर्यटन व्यवसायी संघ नेपाल बागमती प्रदेशका अध्यक्ष दामोदर नेपालले गर्नुभएको थियो। यस्तै, विशेष अतिथिका रूपमा पर्यटन विज्ञ भगिरथ शर्मा सहभागी हुनुहुन्थ्यो। कार्यक्रममा संघका केन्द्रीय सदस्यहरू, पर्यटन तथा होटल व्यवसायीहरूको उल्लेखनीय उपस्थिति रहेको थियो।

कार्यक्रमको स्वागत मन्तव्य सिन्धु सुकुटे पर्यटन व्यवसायी संघकी सदस्य मन्दु थापाले राख्नुभएको थियो। उहाँले बागमती प्रदेशको छैटौं वार्षिक साधारण सभा सिन्धुपाल्चोकमा आयोजना गरिएकोमा आयोजकलाई धन्यवाद व्यक्त गर्नुभयो।

वार्षिक प्रतिवेदन प्रस्तुत गर्दै आयोजक संस्थाका अध्यक्ष दामोदर नेपालले बागमती प्रदेशका विभिन्न स्थानमा कार्यक्रम आयोजना गरिँदा पर्यटन प्रवर्द्धनमा सहयोग पुगेको विश्वास व्यक्त गर्नुभयो। निर्वाचनको आचारसंहिता तथा निर्वाचनकै कारण अपेक्षाकृत कम उपस्थिति रहेको उल्लेख गर्दै उहाँले सुकुटे एक महत्वपूर्ण पर्यटकीय गन्तव्यका रूपमा स्थापित हुँदै गएको बताउनुभयो।

सिन्धु सुकुटे पर्यटन व्यवसायी संघका सचिव कृष्ण सापकोटाले सुकुटे सहित समग्र सिन्धुपाल्चोक जिल्लाको पर्यटन अवस्था, पर्यटन व्यवसायको वर्तमान स्थिति तथा स्थानीय तहहरूले सुकुटेको पर्यटन प्रवर्द्धनमा पुर्‍याएको सहयोगबारे जानकारी गराउनुभयो।

कार्यक्रमका विशिष्ट अतिथि तथा पर्यटन विज्ञ भगिरथ शर्माले होटल तथा पर्यटन व्यवसायले राज्यलाई ठूलो मात्रामा राजस्व तिरेको र विदेशी मुद्रा आर्जनमा महत्वपूर्ण योगदान पुर्‍याएको भए पनि राज्यबाट अपेक्षित सहयोग नपाएको गुनासो गर्नुभयो। उहाँले राज्यले होटल तथा पर्यटन व्यवसायीहरूको आवाज नसुनेको टिप्पणी गर्नुभयो।

कार्यक्रमका प्रमुख अतिथि एवं होटल व्यवसायी महासंघ नेपालका केन्द्रीय अध्यक्ष दिनेशकुमार चुकेले सरकारले होटल तथा पर्यटन व्यवसायीप्रति हेर्ने दृष्टिकोण सकारात्मक नभएको बताउनुभयो। कर्मचारीलाई १० दिनको घुम्ती बिदा दिने व्यवस्था तथा उद्योगसरह होटल तथा पर्यटन व्यवसायलाई विद्युतमा छुट दिने विषय कार्यान्वयन हुन नसकेको उहाँको भनाइ थियो। साथै, होटल तथा पर्यटन क्षेत्रमा दक्ष जनशक्तिको अभाव रहेको, सीप सिकेपछि वैदेशिक रोजगारीमा जाने प्रवृत्ति बढेको उल्लेख गर्दै होटल तालिमलाई प्राथमिकता दिनुपर्नेमा जोड दिनुभयो। उहाँले होटल तथा पर्यटन व्यवसायभित्र रहेका कमजोरीहरू क्रमशः सुधार गर्दै जानुपर्ने आवश्यकता पनि औंल्याउनुभयो।