माथिल्लो भोटेकोसी हाइड्रोको शेयरको लागि लगत संकलन गरिने

काठमाडौं । माथिल्लो भोटेकोसी हाइड्रोपावर कम्पनीको शेयरको लागि लगत संकलन गरिने भएको छ । भोटेकोसी गाउँपालिका वडा नम्बर २ ले एक सूचनाजारी गरेर भोटेकोसी हाइड्रोपावरबाट भोटेकोसीवासीलाइ प्राप्त हुने १० प्रतिशत शेयरको लागि लगत संकलन गर्न लागेको हो ।

वडा अध्यक्ष कुमार श्रेष्ठद्वारा जारी सूचनामा "माथिल्लो भोटेकोशी हाइड्रो पावर कम्पनीको जनतालाइ दिने १० प्रतिशत शेयर प्राप्ति सम्बन्धि यस भोटेकोशी गाउँपालिका नं.२ वडाका काठमाडौंमा बसोबास गरी बस्ने सम्पूर्ण नागरिकहरुको लगत संकलन गर्नु पर्ने भएको हुँदा मिति २०८२/०७/३० गते माकलबारी र मिति २०८२/०८/०१ गते स्वयम्भू नाम्गेलचोकमा तपसिल बमोजिमका कागजातहरु उपलब्ध गराइदिनु हुन यो सूचना प्रकाशित गरिन्छ" भनिएको छ । तल उल्लेखित कागजपत्रको रूपमा सम्पूर्ण परिवारहरुको नेपाली नागरिकताको प्रमाणपत्र फोटोकपी १ प्रति, १६ वर्ष पुरा नभएकाको हकमा जन्म दर्ता प्रमाणपत्र फोटोकपी १ प्रति , बसाइँ सराइ सरी आएकाको हकमा २०८२/०६/२६ भन्दा अगाडीको बसाइँ सराइ फोटोकपी १ प्रति चाहिने भनिएको छ।

भोटेकोसीका स्थानीय बासिन्दाले शेयर पाउनको लागि लामो समय आन्दोलन गरेका थिए। भुकम्प अगाडि नै जुरे पहिरोको बेलामा पनि स्थानीयले शेयर पाउन आन्दोलन गरेको र त्यतिबेला ६ प्रतिशत शेयर स्थानीयलाइ दिने सहमति भएको बाएपनि कार्यान्वयन हुन सकेको थिएन । अहिले त्यहि सहमतिलाइ आधार मानेर १० प्रतिशत माग गरिएको र सोहि अनुसार माथिल्लो भोटेकोसी पावर कम्पनीले दिएको बुझिएको छ ।